周杰倫生日老婆送「最美好的禮物」 曬昆凌巨型孕肚宣布佗第3胎

台灣天王周杰倫（周董）同昆凌結婚7年，育有6歲女兒Hathaway同4歲囝囝Romeo，一家四口幸福美滿。不過曾經講過想生夠五個嘅周董又點會「兩個夠晒數」？今日有爆料指昆凌早已佗住第三佗，消息指二人百密一疏，有人聽到昆凌嘅家姐同朋友傾偈嘅時間提到妹妹已經懷孕！

周杰倫下午喺社交平台post一張老婆大肚相，摸住自己巨型孕肚嘅昆凌一臉幸福，而周董就喺旁邊好似Ironman咁擺post，佢留言公布喜訊：「原本想說出生了再來公布，看了是防守不住，這最美好的禮物，有押『孕』喔！」昆凌都差唔多時間出post：「N°5 coming soon!（5號快將面世！）」二人對BB嘅性別梗係賣關子啦！

{{hket:inline-image name="74973327_140968270577571_3281694519137418365_n.jpg"}}{{/hket:inline-image}}

昆凌自從去年11月出席活動之後冇再公開現身，昨日咁啱係周董嘅43歲生日照，昆凌Post二人喺露營天幕嘅合照，依靠喺周董身邊嘅昆凌身穿白色厚外套遮肚，但下半身依舊纖瘦，唔講真係睇唔出佢再度懷孕。

周董同昆凌都好鍾意小朋友，2人新婚時男方講過想生五胎，一嚟希望屋企熱鬧啲，二嚟可以組成樂團。而家果真成功佗第三胎，邁向周董生夠五個嘅願望一大步。其實昆凌喺佗阿仔Romeo前透露自己患「多囊性卵巢症」，好在經過治療同調理後順利懷上兒子。周董擁有2個寶貝之後體恤太太生產辛苦，當時傳媒問到會唔會再生嘅問題，佢就話暫時冇計劃。

圖片來源：Instagram

撰文：黃蘊姿